费 平
　　“大家快去小菜场， 今朝茭白叶子老多额！ ”听到陈大妈一声叫，邻居们侪纷纷拿了篮头奔向屋后两百米远个菜场……这是阿拉小辰光茭白上市个搿辰光一个场景。 为啥街坊邻居们要去拾茭白叶子呢？
　　上世纪五、六十年代，人们额生活水准普遍侪勿富裕。 居住勒了棚户区个居民大多家境穷困。隔壁苏北大妈姓陈，伊拉就是典型个贫困户，伊生了七个小人，靠老头踏三轮车供养一家门， 除脱三顿饭勉强吃得上， 家徒四壁个伊拉只能靠“拾荒”来贴补。
　　人说“穷则思变”。 有一年初夏陈大妈从小菜场抱了交关茭白叶子回来，汏清爽后摊勒竹床、铺板浪厢晒干，然后用木梳像梳头一样把茭白叶子梳成细条状，再用旧布、或破衣裤等缝成长方形个袋袋，把茭白叶子塞进去缝上口，一个枕头就完成了。后来邻居们也都学伊样，纷纷做起了“茭白枕头”。
　　我搿辰光也学着陈大妈，一到茭白大量上市个季节就搭仔邻居们一道去小菜场。 大家有额拿菜篮、绳子，有额拿蒲包、麻袋，那堆成小山的茭白叶子一息息就被大家抢光。 转来以后，每家人家用木桶或者汏脚盆放茭白叶，从“给水站”挑来水清洗几遍。 茭白叶汏好后就勒太阳下晾晒，有额人家铺板不够，台子、凳子、竹椅子等凡是可以晾晒的物什统统拿出来，还有额人家干脆用草席铺勒地浪厢晒。叶子晒干后就是“梳头”，大家坐勒小矮凳浪，拿木梳将干茭白叶梳成细丝状。 看看一脚桶，塞到布袋里却只有四分之一。 因此，一个枕头塞满起码要塞四五脚桶叶子。
　　茭白叶枕头柔软、 透气而且有股清香味道，枕勒头下闻着搿浓浓格蔬香味，会得促进睡眠让人很快进入梦乡。当然，茭白本身也有非常丰富格营养价值，含有交关矿物质搭仔维生素等， 伊个味道也老鲜美，而且价格便宜。
　　如今茭白栽种是春、 夏双季了，5-6月、10-12月收获上市，产量侪较高。但是介许多茭白叶侪进了垃圾桶， 拇没人会得像阿拉当年拿伊做枕芯了。